अलविदा! अभिनेता इरफान खानवर मुंबईत अंत्यसंस्कार

अलविदा! अभिनेता इरफान खानवर मुंबईत अंत्यसंस्कार

मुंबई- बॉलिवूड अभिनेता इरफान खान यांच्या पार्थिवावर अंधेरीतील यारी रोड, वर्सोवा स्मशानभूमीत अंत्यसंस्कार करण्यात आले. यावेळी सिनेसृष्टीतील फार मोजकी मंडळी उपस्थित होती. मुंबई पोलिसांच्या कडेकोट बंदोबस्तात इरफान यांच्यावर अंत्यसंस्कार करण्यात आले. लॉकडाउनच्या परिस्थितीत फार कमी लोकांना इरफान यांच्या अंत्यसंस्काराला जाण्याची परवानगी देण्यात आली होती. चाहते, मीडिया आणि सिनेसृष्टीतील इतर कोणत्याही व्यक्तीला गर्दी करण्याची परवानगी मुंबई पोलिसांनी दिली नाही.
विशाल भारद्वाज, मिका सिंग, कपिल शर्मा असे मोजके सेलिब्रिटी अंत्यसंस्कारांवेळी उपस्थित होते. याशिवाय इरफान राहत असलेल्या इमारतीतील त्यांचे शेजारील काही उपस्थित होते. सूत्रांनी दिलेल्या माहितीनुसार, अंत्यसंस्काराच्यावेळी स्मशानभूमीत कुटुंबातील फक्त पाचजणांना आत येण्याची परवानगी देण्यात आली होती. यावेळी त्यांची दोन्ही मुलं बाबिल आणि अयान उपस्थित होते. इरफानचे सर्वात जवळचे मित्र दिग्दर्शक तिग्मांशू धुलिया इरफानच्या कुटुंबासोबत इस्पितळात होता.

बॉलिवूड अभिनेता इरफान खान यांचं वयाच्या ५३ व्या वर्षी निधन झालं. मंगळवारी कोलन इन्फेक्शनमुळे त्यांना इस्पितळात भरती करण्यात आलं होतं. पण बुधवारी त्यांची प्राणज्योत मालवली. इरफान खान यांना न्यूरोएण्डोक्राइन ट्यूमरचा आजार होता. लंडनमध्ये त्यांच्यावर काही काळ उपचारही सुरू होते. तब्येतीत सुधारणा आल्यानंतर ते भारतात परतले होते. मात्र पुन्हा दोन दिवसांपासून त्यांची प्रकृती खालावली अन् कोकिलाबेन धीरूभाई अंबानी रुग्णालयात त्यांनी अखेरचा श्वास घेतला.

गेल्या काही वर्षांपासून इरफान आजारी होता. २०१७ मध्ये कर्करोगावर उपचार करण्यासाठी तो परदेशात गेला होता. याबद्दल त्याने स्वतः सोशल मीडियावर माहिती दिली होती. गेल्या वर्षी २०१९ मध्ये तो भारतात परतलाही. भारतात आल्यानंतर त्याने 'अंग्रेजी मीडियम' सिनेमाचं चित्रीकरण पूर्ण केलं होतं.

२०१८ पासून सुरू होते उपचार -
इरफान खान यांना न्यूरोएण्डोक्राइन ट्यूमरचा आजार होता. लंडनमध्ये त्यांच्यावर काही काळ उपचारही सुरू होते. तब्येतीत सुधारणा आल्यानंतर ते भारतात परतले होते. मात्र पुन्हा दोन दिवसांपासून त्यांची प्रकृती खालावली अन् कोकिलाबेन धीरूभाई अंबानी रुग्णालयात त्यांनी अखेरचा श्वास घेतला आहे.

कोकिलाबेनमध्ये नियमित सुरू होतं चेकअप-
लंडनहून भारतात परतल्यानंतर इरफान यांचं नियमित चेकअप व्हायचं. गेल्या काही महिन्यांपासून ते कोकिलाबेन इस्पितळात उपचार घेत होते. 'अंग्रेजी मीडियम' सिनेमाच्या चित्रीकरणावेळीही अनेकदा त्यांची तब्येत बिघडायची. अशावेळी अनेकदा सिनेमाचं चित्रीकरण थांबवलं जायचं आणि जेव्हा इरफान यांना चांगलं वाटायचं तेव्हा चित्रीकरण पुन्हा सुरू केलं जायचं.