कोरोनामुळे सोलापुरात रविवारी फेसबुक लाइव्हद्वारे जागतिक योगदिन साजरा होणार

कोरोनामुळे सोलापुरात रविवारी फेसबुक लाइव्हद्वारे जागतिक योगदिन साजरा होणार

 महिला केंद्रीय प्रभारी सुधा अळ्ळीमोरे यांचे आवाहन

सोलापूर  (प्रतिनिधी) कोरोनाच्या पार्श्वभूमीवर यंदाचा जागतिक योगदिन फेसबुक लाइव्हच्या माध्यमातून साजरा करण्यात येणार आहे, अशी माहिती पतंजली योगपीठच्या महिला केंद्रीय प्रभारी सुधा अळ्ळीमोरे यांनी दिली.

   येत्या २१ जून रोजी सहावा आंतरराष्ट्रीय योग दिवस जगभर साजरा केला जाणार आहे. मागील पाच वर्षापासून हा दिवस आपण अत्यंत उत्साहाने साजरा केला आहे. भारतीय संस्कृतीतील योगाचे महत्त्व अधोरेखित होण्याचे प्रयत्न या दिना निमित्ताने होते. मानवाच्या शारीरिक, मानसिक, बौद्धिक विकासाबरोबर अध्यात्मिक उन्नतीची परिसीमा योग साधनेतुन साधता येते. पंतप्रधान नरेंद्र मोदी यांनी सप्टेंबर २०१४ मध्ये संयुक्त राष्ट्राच्या महासभेत २१ जून हा दिवस आंतरराष्ट्रीय योग दिन म्हणून साजरा करण्याचा प्रस्तावाला मांडला आणि डिसेंबरमध्ये त्याला मान्यता मिळाली. २१ जून २०१५ रोजी पहिला आंतरराष्ट्रीय योग दिवस जगभरात उत्साहाने साजरा करण्यात आला. यानिमित्ताने योगाला घराघरात पोचवण्याचे योगगुरू स्वामी रामदेवजी महाराज यांचे स्वप्न पूर्ण झाले.

     यावर्षी म्हणजेच रविवार दिनांक २१ जून २०२० रोजी हा योग दिवस कोरोनामुळे सामुहिकपणे साजरा करता येणार नाही. पण या महामारीवर मात करण्यासाठी योग साधना हेच सर्वात मोठे औषध आहे. म्हणून हा योग उत्सव आपण पतंजली योग समिती व  वेगवेगळ्या योग संघटनेच्या माध्यमातून फेसबुक लाईव्हच्या मदतीने आपण घरीच साजरा करणार आहोत. रविवारी सकाळी ७ ते ८ या वेळेत पतंजली योग समिती महाराष्ट्रद्वारा प्रत्येक जिल्ह्यातून फेसबुक लाईव्ह द्वारा हा कार्यक्रम होणार आहे. आयुष मंत्रालयाच्यावतीने स्वामी रामदेव महाराजांच्या सानिध्यात हरिद्वार वरून हा कार्यक्रम प्रसारित करण्यात येणार आहे. तरी नागरिकांनी आस्था चॅनल तसेच फेसबुक लाईव्हद्वारे कार्यक्रम पाहून आपण घरीच योग करुन आंतरराष्ट्रीय योग दिवस साजरा करावा, असे आवाहन अळ्ळीमोरे यांनी केले आहे.