'ही' लक्षणे दिसल्यास करावी लागणार करोना चाचणी

जगभरात करोनाचा कहर सुरू आहे. करोनाचा वाढणारा संसर्ग रोखण्यासाठी आणि करोनाच्या आजारावर उपचार शोधण्यासाठी जगभरातील डॉक्टर, वैज्ञानिक प्रयत्न करत आहेत. मात्र, करोनाच्या विषाणूंचा मानवी शरिरावर वेगवेगळ्या प्रकारे हल्ला होत असल्याने संशोधकही चक्रावले आहेत. करोनाचा संसर्ग सुरू झाल्यानंतर आजाराची काही लक्षणे बाधितांमध्ये आढळत होती. आता मात्र, करोनाचा संसर्ग झालेल्यांपैकी अनेकांमध्ये आजाराची कोणतीही लक्षणे आढळत नसल्याचे समोर आले आहे. आता, ब्रिटनमधील आरोग्य विभागाने काही निर्देश जारी केले आहेत. त्यानुसार करोनाच्या संसर्गाचे विक्राळ रुप समोर आले आहे. ही लक्षणे आतापर्यंत करोनाबाधितांपेक्षाही वेगळी आहेत. आजाराची ही लक्षणे अल्पवयीन, लहान मुलांमध्ये मोठ्या प्रमाणावर आढळत आहेत. त्यामुळे ब्रिटनमध्ये आणखी चिंता व्यक्त केली जात आहे.

'ही' आहेत लक्षणे

कोविड-१९ च्या थैमानामुळे ब्रिटनमधील आरोग्य व्यवस्थेसमोर आव्हान निर्माण झाले आहे. करोनाची बाधा झालेल्या काही मुलांमध्ये वेगळ्याच प्रकारची लक्षणे आढळली आहेत. वेगवेगळ्या वयोगटातील करोनाबाधित तरुणांमध्ये ताप, कमी रक्तदाब, शरीरावर चट्टे उठणे आदी लक्षणे दिसून आली आहेत. यामध्ये पोटदुखी, डायरिया आदी लक्षणे ही दिसून आली आहेत. अशा प्रकारची लक्षणे दिसणाऱ्या तरुणांमध्ये अल्पवयीन मुलांचे प्रमाण अधिक असल्याने चिंता व्यक्त होत आहे. इतर करोनाबाधितांपेक्षा ही लक्षणे वेगळीच आहेत.

तज्ञ काय म्हणतात?

अल्पवयीन मुलांमध्ये अशा प्रकारची लक्षणे दिसणे ही चिंतेची बाब असल्याचे मत तज्ञांनी व्यक्त केले आहे. अशा प्रकारची काही लक्षणे आढळल्यास नागरिकांनी तातडीने डॉक्टरांशी संपर्क साधण्याचे आवाहन ब्रिटनमधील तज्ञांनी केले आहे. ब्रिटनमधील प्रसारमाध्यमांनी दिलेल्या वृत्तानुसार, या प्रकारच्या आजाराची लक्षणे दिसून आलेल्या अल्पवयीन मुलांपैकी कितीजणांना करोनाची बाधा झाली आहे, याची अधिकृत आकडेवारी समोर आली नाही. मात्र, तरीदेखील काळजी घेण्याचे आवाहन करण्यात आले आहे.

डॉक्टरांचा इशारा

करोनाचा संसर्ग वाढत असल्यामुळे डॉक्टरांनीदेखील कोणताही आजार, लक्षणांकडे दुर्लक्ष न करण्याचे आवाहन केले आहे. शरीर पिवळे पडणे, श्वास घेण्यास त्रास जाणवणे, जीवावर बेतेल इतका हा श्वास घेण्याचा त्रास वाढणे, ओठांजवळ निळ्या रंगाचे चट्टे, डाग दिसणे, शरीर सु्न्न होणे, शरीरावर चट्टे उठणे, लहान मुलांना अंडकोषात दुखण्याचा त्रास जाणवणे, आदी प्रकारची लक्षणे आढळल्यास डॉक्टरांचा सल्ला घेण्याचे आवाहन ब्रिटनमध्ये करण्यात आले असून करोनाची चाचणी करण्यात येणार आहे.