किम जोंग आजारीच, चालताही येत नसल्याचा दावा

किम जोंग आजारीच, चालताही येत नसल्याचा दावा

सेऊल: उत्तर कोरियाचे राष्ट्राध्यक्ष किम जोंग उन यांच्या प्रकृतीबाबतच्या चर्चांना अद्यापही पूर्ण विराम लागला नाही. उत्तर कोरियातून बंडखोरी करणारे उत्तर कोरियाचे माजी परराष्ट्रसंबंधविषयक मुत्सद्दी थाई योंग हो यांनी आणखी एक दावा केला आहे. किम जोंग यांची प्रकृती गंभीर असून त्यांना स्वत: च्या पायावर उभे राहता येत नसल्याचा दावा त्यांनी केला आहे.
उत्तर कोरियाच्या 'पोलादी' भिंतीमुळे राष्ट्राध्यक्ष किम जोंग उन यांच्या प्रकृतीबाबत काहीही ठोस माहिती उपलब्ध होत नाही. उत्तर कोरियातील माध्यमांमध्ये ही ११ एप्रिल रोजी किम यांचे काढलेले छायाचित्र सोडले तर इतर कोणतीही माहिती अद्याप प्रकाशित केली नाही. दरम्यान, सीएनएनला दिलेल्या मुलाखतीत थाई योंग हो यांनी सांगितले की, किम यांच्यावर कोणती शस्त्रक्रिया झाली याची माहिती देता येणार नाही. मात्र, एक स्पष्ट आहे की, किम यांना स्वत: च्या पायावर उभे राहणे कठीण आहे. त्यांना उभे राहण्यासाठीदेखील इतरांच्या आधाराची आवश्यकता असून चालताही येत नसल्याचा दावा त्यांनी केला.
किम यांच्या प्रकृतीबाबत फक्त काहीच जणांना याबाबत ठोस माहिती आहे. सीएनएनने याआधी किम यांची मृत्यूशी झुंज सुरू असल्याची माहिती दिली होती. अमेरिकेच्या काही अधिकाऱ्यांनीदेखील याची पुष्टी केली. त्यानंतर किम यांच्यासाठी चीनने डॉक्टरांचे एक पथक उत्तर कोरियाला रवाना केले होते.