पंढरपूर शहरात मॉर्निंग वॉकसाठी रस्त्यावर फिरणाऱ्या 24 जणांवर कारवाई

पंढरपूर शहरात मॉर्निंग वॉकसाठी रस्त्यावर फिरणाऱ्या 24 जणांवर कारवाई 

पंढरपूर प्रतिनिधी:कोरोना विषाणूंचा प्रादुर्भाव रोखण्यासाठी संपूर्ण राज्यात संचार बंदी  लागू करण्यात आली आहे.नागरीकांना जीवनावश्यक वस्तूचा पुरवठा सुरळीत राहील यासाठी प्रशासन प्रशासन सज्ज आहे. नागरीकांनी  अत्यावश्यक कारण असल्याशिवाय घराबाहेर पडू नये असे आवाहन  उपविभागीय पोलीस अधिकारी डॉ.सागर कवडे व पंढरपूर शहर पोलिस ठाणेचे पोलीस निरीक्षक श्री.अरुण पवार यांनी केले आहे.

      संचारबंदी लागू असताना देखील काही नागरीक विनाकारण घराबाहेर पडत आहेत.अत्यावश्यक कारण असल्याशिवाय नागरीकांनी घराबाहेर पडू नये असे आवाहन प्रशासनामार्फत करण्यात येत आहे. मात्र नागरीकांकडून त्याकडे दुर्लक्ष केल्याचे दिसून येत आहे. आज दि.31/03/2020 रोजी सकाळी 05:00 ते 07:00 या वेळेत पंढरपूर शहर पोलीस स्टेशन हद्दीतील टाकळी रोड, नवीन कराड नाका रोड, लिंक रोड, इसबावी या भागात नागरीक मॉर्निंग वॉकसाठी बाहेर पडलेले आढळून आले.  अशा विनाकारण रस्त्याने बाहेर फिरणाऱ्या 24 नागरीकांवर संचारबंदीचे उल्लंघन केल्याप्रकरणी कारवाई करण्यात आली आहे.

        कोरोना विषाणू आपत्तीच्या अनुषंगाने संपूर्ण महाराष्ट्र राज्यामध्ये लॉक डाऊन तसेच संचारबंदी लागू करण्यात आलेली आहे. कोरोना हा संसर्गजन्य रोग असून सामाजिक संपर्क टाळणे हे संसर्ग रोखण्यासाठी अत्यंत महत्त्वाचे आहे. नागरीकांनी संचारबंदीचे काटेकोरपणे पालन करुन, संचारबंदीच्या काळात घरातच थांबून कोरोना विषाणूचा प्रादुर्भाव रोखण्यासाठी प्रशासनाला सहकार्य करावे असे आवाहन उपविभागीय पोलीस अधिकारी डॉ.सागर कवडे व पंढरपूर शहर पोलिस ठाणेचे पोलीस निरीक्षक अरुण पवार यांनी केले आहे.

       सदरची कारवाई उपविभागीय पोलीस अधिकारी डॉ.सागर कवडे,पंढरपूर शहर पोलिस ठाणेचे पोलीस निरीक्षक अरुण पवार यांचे मार्गदर्शनाखाली मॉर्निंग स्कॉड पथकातील पोसई भिंगारदेवे, पोहेकॉ शिंदे व पोकॉ बालाजी कदम यांनी केली आहे.